Um mig

Ég nýt þeirra forréttinda að starfa hjá Háskóla Íslands þar sem sífelld þekkingarleit og miðlun á vinnustaðnum er til þess fallin að opna huga manns og víkka sjónarhorn á ýmis viðfangsefni.

Í kennslu hef ég komið að námskeiðum sem fjalla um borgaravitund og virka þátttöku barna og ungs fólks, bæði í stjórnmálastarfi og félagslegu starfi. Jafnframt hef ég leitt námskeið um áhættuhegðun og seiglu ungmenna þar sem fjallað er um áhættuþætti og verndandi þætti í lífi þeirra sem geta haft þýðingu fyrir farsæld þeirra til framtíðar. Áherslan er á mikilvægi þess að efla verndandi þætti og grípa inn í líf barna sem búa við áskoranir í lífi sínu með það fyrir augum að auka líkur á að þeim farnist vel þrátt fyrir mótdrægar aðstæður. Sömuleiðis að setja inn snemmbær úrræði um leið og merki sjást um vanlíðan, áhættuhegðun eða aðrar hindranir og styðja við tækifæri barna og ungmenna til að þroskast og nýta krafta sína til fulls. Með frábæru samstarfsfólki hef ég jafnframt komið að námskeiðum um mannréttindi, sjálfboðaliðastarf og farsæld barna.

Rannsóknir mínar hafa snúið að framangreindum sviðum en sömuleiðis hef ég átt farsælt samstarf við vettvang á þessum sviðum. Þannig hef ég til að mynda unnið með sveitarfélögum, ráðuneytum, opinberum stofnunum eins og Miðstöð menntunar og skólaþjónustu, Ríkislögreglustjóra og Embætti landlæknis en jafnframt félagasamtökum eins og Rauða krossinum og UNICEF.